Əli Orucov 

AMİP liderinin köməkçisi, politoloq Əli Orucov Paşinyanın sülhdən yayınmaq üçün ən müxtəlif yollara əl atdığını söylədi: "Ermənistanın baş naziri Nikol Paşinyan üzərinə götürdüyü öhdəliklərdən, o cümlədən beynəlxalq təşkilatların vasitəçiliyi ilə aparılan danışıqlarda olan öhdəliklər də daxil olmaqla, həmçinin sülh sazişini imzalamaqdan yayınmaq üçün hər dəfə müxtəlif təkliflər irəli sürür. Məqsəd necə olursa-olsun Bakını sülh prosesini pozmaqda ittiham etmək, dünya ictimaiyyətinin qınağına çəkmək və qisas almaq üçün münasib vaxtın yetişməsini gözləməkdir. Təəssüflər olsun ki, Qərb Paşinyanın ikili oyunlarına, onun məsum və sülhpərvər roluna bəzən aldanır. Paşinyan öz ölkəsində silahlara nəzarət edə bilsəydi, 17 min "Kalaşnikov" avtomatı "it-bata” düşməzdi. Bu silahların harada olmasına və necə "it-bata” düşməsinə aydınlıq gətirilməsə, təhlükələrin sovuşmasından danışmaq sadəlövhlük olardı. Paşinyanın Bakıya göndərdiyi son təkliflərini qəbuledilməz hesab edirəm. Azərbaycan Ermənistan kimi məkrli və təcavüzkar, həmçinin da yaradıldığı gündən xəyanət yolu tutan, böyük güclərin istifadə alətinə çevrilən bir dövlətlə qonşudur. Ona görə də məcburdur ki, ayıq-sayıq və güclü olsun. Bu gün Ermənistan zəif durumda Azərbaycanın regional gücə çevrildiyinin, dünyanın ən müasir döyüş taktikasına və silahlarına sahib bir modern orduya malik olduğunun fərqindədir. Bakı ilə belə üstün pozisiyada masa arxasında oturmağı təbii ki, Paşinyan istəmir. Onun Fransa daxil bəzi Qərb havadarları da Azərbaycanın üstün balansını bərabərləşdirməyə gücü yetmədi. Mən isə düşünürəm ki, Azərbaycan üstün və qalib mövqeyindən heç nəyə məhəl qoymadan Ermənistanı danışıqlara məcbur etməli və şərtlərini diktə etməlidir. Heç kəsə sirr deyil ki, Ermənistan indiki reallıqlarda Bakı ilə sülh sazişi imzalamayacaq. Paşinyanın da Ribbentrop rolunda çıxış etməsi mümkün deyil. Əvvəla qeyd edim ki, Ribbentrop - Molotov paktı faşist Almaniyası ilə SSRİ arasında Şərqi Avropanın öz aralarında bölünməsinı nəzərdə tuturdu. Həmin pakta əsasən, SSRİ Pribaltika, Finlandiya, Polşa, Ruminiya ərazilərinin bir hissəsini özünə ilhaq etdi. Faşist Almaniyası da eyni addımlar atdı. Bu akt imperialist güclərin dünyanın yenidən nüfuz dairələrinə bölüşdürülməsi və işğal siyasətini razlaşdıran cinayətkar bir akt idi. Azərbaycan SSRİ deyil və təcavüzkar siyasət yürütməyir. Xarici siyasətinin də ana xəttini sülh və təhlükəsizlik tutur. Azərbaycan heç yerə hücum etməyə hazırlaşmır. Baxmayaraq Qərbdə də ermənilərin bu yalanına inananlar var. Əksinə, Azərbaycan özünün Ermənistanın revanşist qüvvələrindən etibarlı müdafiəsini qurmalıdır.  Lakin bu heç də o anlam kəsb etməməlidir ki, sonsuza qədər Ermənistanla sülh barədə danışmalıdır, işğal altında qalan ərazilərini qaytarmamalıdır, milli maraqlarından imtina etməlidir. Azərbaycan Böyük Öndər Atatürkün "Yurdda sülh, cahanda sülh”  prinsipinə əsaslanmalıdır".