Əvvala, ondan başlayaq ki, dünya birjalarında bütün şirkətlər məhsullarını trader şirkətlərinə satırlar. Bu traderlər bazarın əsas oyunçuları arasında rəqabət yaradaraq, məhsulları onlardan alır və alıcıya təklif edirlər. Traderlərin məhsulları  kimə satmasına isə şirkətlər nəzarət edə bilmir. Yəni, bazar mexanizmi budur.

SOCAR-ın İstanbul ofisinə edilən basqın və guya ki, bunun İsrailə neft satışı ilə əlaqələndirilməsi cəhdi təxribatdır. Bu sahədən az-çox anlayışı olanlar bilir ki, SOCAR İsrailə neft satmır.  Bu "etirazlar"ın əsas məqsədi Türkiyə ictimai rəyində SOCAR-ın nüfuzu və reputasiyasını zədələməkdir.

Türkiyədəki iranpərəst qüvvələr SOCAR-ı ləkələmək üçün öz səylərini davam etdirir və son hücumun da onların tərəfindən təşkil edilməsinə qətiyyən şübhə yoxdur. Fransız mediası və jurnalistlərinin prosesdə fəal iştirakı, ölkəmizə qarşı hücumları da diqqətdən yayınmır.  Erməni lobbisi son hücumdan öz xeyrinə "məharətlə" istifadə etməyə çalışır.

Cümə günü bir qrup təxribatçı SOCAR-ın İstanbulda ofisinə hücum edərək, bina divarlarına qırmızı boya töküb. Xuliqanlar binaya daxil olmağa cəhd etsələr də, onların qarşısı mühafizəçilər tərəfindən alınıb. 

SOCAR Türkiyə hücum cəhdi ilə bağlı bəyanat verib və bəyanatdan da göründüyü kimi, təxribatçı qüvvə və dairələr Azərbaycanımızın nüfuzunu beynəlxalq miqyasda zədələmək üçün səfərbər olunublar.

Lakin tarixi təcrübə də göstərir ki, bu cür təxribatlar nəticəsizdir və təxribatçı qüvvələrin arzusu bu dəfə də gözlərində qalacaq.

Azər Niftiyev