İsmayıl Vəliyevin oğlundan atasının anım günündə təsirli sözlər: “Dürüst və şərəfli ömür sürdün”(VİDEO)

İsmayıl Vəliyevin oğlundan atasının anım günündə təsirli sözlər: “Dürüst və şərəfli ömür sürdün”(VİDEO)

7NEWS.az xəbər verir ki, bu gün yazıçı-publisist, filologiya elmləri doktoru, qəzetçi-yazar, tədqiqatçı-alim, professor İsmayıl Ömər oğlu Vəliyevin anım günüdür. Tanınmış professor 9 dekabr 2017-ci ildə dünyasını dəyişmişdir. Anım günündə oğlu Önər Vəliyev atasının əziz xatirəsinə həsr olunmuş videoçarx paylaşıb və təsirli məktub yazıb. Sözügedən məktubu və videoçarxı təqdim edirik:

"Əziz Atam!

Sənin ölkəmizə və xalqımıza xidmətlərindən, elmi titullarından və tutduğun vəzifələrdən asılı olmayaraq ilk növbədə bizim çox əziz və qiyməti ölçülməz atamız idin...

Hər sevinc, istək, ağrı və duyğumuzu hiss edən, hər qayğımıza qalan, bizi halal çörəklə, mərdcəsinə böyüdən və özündən sonra təmiz, şərəfli ad, böyük elmi və ictimai irs buraxan Atamız...

Düz 4 ildir ki, cismən bizdən ayrılmısan. Sənin artıq cismin də, ruhun da yaşayışın kimi haqqa sığınıb. Haqqa olan sevgin bir ömür bitmədi. Nə qədər ədalətsizliklə, haqsızlıqla rastlaşsan da, sən ləyaqət və mənəviyyat ölçülərindən kənara çıxmadın, heç zaman haqqı nahaqqa qurban vermədin.

Sevinirəm ki, dürüst və şərəfli ömür sürdün.

Amma çox kədərliyəm ki, erkən ölümünlə bizi ömürlük hüznə qərq etdin, xalqımızı isə çox dəyərli şeylərdən məhrum etdin.

Hələ kim bilir, nə qədər monoqrafiya, dərslik, dərs vəsaiti, məqalə yazacaqdın, nə qədər yeni ensiklopediya hazırlayacaqdın...

Rəsmlərinə, videolarına baxa-baxa bizimlə olduğun yüzlərlə, minlərlə xatirən göz önümdən keçir...

Gözəl günlər də, çətin günlər də heç zaman unudulmur Ata... Amma ən çətin gün övladın valideyini ilə vidalaşdığı tarixdir.

Sabah sənin anım günündür.

4 ildir ki, övladların, əzizlərin səninlə yalnız məzarının üstündə görüşə bilir, dərdləşə bilir, söhbətləşə bilir...

Səni xatırlayanlar və sevənlər səni unudubmuş kimi davrananlardan qat-qat çoxdur, Ata.

Ruhun şad olsun, hər anımız səninlədir! Xəyalımızda və ürəyimizdəsən!”

 


 

 

 

Xəbər lenti