"ABŞ cənubi Qafqaza girir, Gürcüstandakı uğursuzluqdan sonra bu dəfə Ermənistan vasitəsilə”

7NEWS.az xəbər verir ki, bu sözləri tanınmış hüquqşunas Polad Mehdi son hadisələrə münasibət bildirərkən deyib: "Məlum olduğu kimi 44 günlük müharibədən sonra bölgədə yeni siyasi və hərbi reallıqlar yarandı. Qarabağ atəşkəs bəyanatı imzalanır. Bəyanatın 9-cu bəndinə əsasən bölgədəki bütün iqtisadi və nəqliyyat əlaqələri blokdan çıxarılır. Ermənistan Azərbaycanın qərb bölgələri ilə NMR arasında nəqliyyat əlaqəsinə zəmanət verir. Gündəmə Zəngəzur dəhlizi məsələsi gəlir. "Minsk qrupunun fəaliyyəti dayandırılır. Azərbaycan Respublikasının Prezidenti təmas xəttinin və status-kvonun olmadığını bəyan edir.

Dağlıq Qarabağ anlayışı aradan qalxır, Prezidentin 07. 07. 2021-ci il tarixli fərmanı ilə Qarabağ iqtisadi rayonu yaradılır. Lakin görürük ki, ABŞ artıq fəaliyyət göstərməyən "Minsk qrupuna” yeni "həmsədr” təyin edir, tez-tez "Dağlıq Qarabağ” ifadəsini dilə gətirir və s. Ermənistan tərəfindən təxribat törədilir və Azərbaycana qarşı hərbi təcavüz edir. Ermənistan Azərbaycan arasındakı təxribatlar və lokal müharibələr sərf edir: Ermənistana (ən çox Paşinyan hakimiyyətinə) ABŞ-a(Qərbə) sərf etmir: Azərbaycana və Rusiyaya Ermənistan sülh şərtlərini qəbul etmək istəmir. Azərbaycanın ərazi bütövlüyünü tanımaq istəmir. Ən azından Rusiya-Ukrayna müaribəsi səbəbindən bu prosesi ləngitməyə, müddəti uzatmağa çalışır. Bu cür lokal müharibələrlə bütün dünyaya Qarabağ probleminin mövcud olduğunu, birgə yaşamağın mümkün olmadığını göstərmək istəyir. Lokal müharibələr Rus sülhməramlılarınln işinin öhdəsindən gələ bilmədiyi görüntüsü yaradır və daha fərqli güclərin bölgəyə gəlməsinə zəmin yaradır. Rusiya: Bölgədə kifayət qədər mövqeləri var. Həm Ermənistanda həm də sülhməramlılar qismində Qarabağda (Azərbaycanda). Ukraynada başı sıxışan Rusiyaya bölgədə yeni macəra lazım deyil. Yəni Rusiya edir, Rusiya qazanır, möhkəmlənmək istəyir, Paşinyanı devirmək istəyir və. s kimi fikirlər hesab edirəm ki həqiqətə uyğun deyil. Ermənistan 30 ildir torpaqlarımızı işğal altında saxlayır. İşğalçı kimi münasibət görmür. Qərb dünyası səssiz qalır.

Bir günlük müharibədə Ermənistandakı hədəflər zərərsizləşdirilir. Qərb əməlli başlı narahat olur. Ermənistanla Azərbaycan arasındakı son toqquşmanı BMT Təhlükəsizlik Şurasında müzakirəyə çıxarır. Bəyanat bəyanat dalınca verilir. Və Tayvana gedən Nensi Pelosi Ermənistana gəlir”

"Qoy hec kim yaddan çıxarmasın, Azərbaycan bu gün dünyanın güclü və inkişaf etmiş ölkələrindən biridir.”

7NEWS.az xəbər verir ki, bu sözləri millət vəkili İlham Məmmədov son hadisələrə münasibət bildirərkən deyib: "ABŞ konqresinin nümayəndələr palatasının spikeri Nensi Pelosinin Ermənistana səfəri çərçivəsində Azərbaycan əleyhinə verdiyi açıqlamalar hər bir azərbaycanlının hissiyyatına toxunan bir bəyanat olduğu üçün kəskin etirazımızı mətbuat və digər vasitələrlə bildiririk. Bu olduqca qərəzli və iki ölkə arasında mövcud əlaqələrinə kölgə salan bir bəyanatdır. Ölkəmizin prezidenti cənab İlham Əliyevin apardığı qlobal səviyyəli uğurlu siyasət nəticəsində Azərbaycan Amerika münasibətləri həmişə yüksələn xətlə inkişaf edib. Nensi Pelosinin bu bədnam bəyanatı isə iki ölkə arasındakı münasibətləri sanki açıq şəkildə pozmağa yönəlmişdir. Əslində bu kimi bəyanatları son 30 ildə biz çox eşitmişik.

1992-ci ildə ölkəmizə qarşı hərbi təcavüz edən Ermənistan deyil təcavüzə məruz qalan Azərbaycanı cəzalandırmaq üçün Azadlıq aktına 907-ci düzəlişi qəbul edən ABŞ konqresindən və o zamanlarda bu aktın ölkəmiz əleyhinə qəbul olunmasında xüsusi canfəşanlıq göstərmiş Nensi Pelosidən bundan artıq nə gözləmək olar ki. Əlbəttə Hamıya aydındır ki bu ssenari Amerika konqresinə bu yaxınlarda keçiriləcək aralıq seçkilərdə qalib gəlmək ücun Amerikada olan erməni lobbisinin dəstəyini almaqdır. Əslində bu halın özü Amerika kimi dünya güclərindən biri olan dövlətin özünə baş ucalığı gətirmir. Bir azacıq erməninin səsini almaq üçün bu qədər riyakarlıq dünyanın fundamental demokratik dəyərlərinə də böyük bir zərbədir. Nensi nənə erməniləri barmağına dolayaraq onların səsini almağa ümid edir ermənilər isə xəyallarında bir daha dənizdən dənizə yeni formatda Ermənistan qururlar necən ki, bu keçən əsrin əvvəllərində də də dənizdən dənizə Ermənistanı xəyallarında canlandırmışdılar. Yəqin yenə də fikirləşirlər ki, Nensi gəldisə yəqin Azərbaycan və Türkiyə əleyhinə yeni bir bədnam Sevr müqaviləsi hazırlamağa ümid var yəni keçən əsrin əvvəllərində olduğu kimi Azərbaycanın və Türkiyənin əleyhinə yönəlmiş bədnam Sevr müqaviləsi imzalanacaq və Vilson Ermənistanı qurulacaq. Hesab edək ki, bu ermənilərin və onların qoca nənəsi Pelosinin əbədi yuxusu kimi olaraq qalacaqdir. Qoy hec kim yaddan çıxarmasın, Azərbaycan bu gün dünyanın güclü və inkişaf etmiş ölkələrindən biridir. Onun güclü və qüdrətli ordusu var. 44 günlük vətən müharibəsində Azərbaycan ordusunun gücünü və qüdrətini bütün dünya gördü. Bu gücün nüvəsində isə onu müzəffər və qətiyyətli Ali baş komandanı vətənimizin bir qarışına qarşı belə əl uzadanlara qarşı həmişə barışmaz olub. Qoy bunu da heç kim yaddan çıxarmasın.”

"ABŞ və Fransada səfirliyimizə edilən basqına göz yumulması əslində həmən ölkələrin acizliyi kimi də dəyərləndirilməlidir.”

7NEWS.az xəbər verir ki, bu sözləri millət vəkili Sahib Alıyev son hadisələrə münasibət bildirərkən deyib: "Mən ABŞ və Fransada hayların Azərbaycan səfirliyinə qarşı etdikləri basqıya, törətdikləri vəhşiliyə gərəkən reaksiyanın verilməməsinə təbii baxıram. Axı söhbət o ölkələrdən gedir ki, onlar Azərbaycanın işğal altındakı torpaqlarındakı hay vandalizminə də uzun illər göz yumurdular, halbuki ən azından Minsk qrupunun həmsədrləri olaraq belə etməməli idilər.

ABŞ və Fransada səfirliyimizə edilən basqına göz yumulması əslində həmən ölkələrin acizliyi kimi də dəyərləndirilməlidir. Görünür, onlar bizim regionda proseslərə təsir göstərə bilmədiklərindən bu yolla haylara dəstəklərini sərgiləyirlər.

Və ABŞ-ın Azərbaycandakı səfirliyi də yaxşı olar ki, öz səhifəsində bizim gözəl tanıdığımız Vudro Vilsondan Nensi Pelosinin İrəvanda tökdüyü göz yaşları kimi manipulyasiya xarakterli sitat yerləşdirməkdənsə, sözü gedən xanımın ölkəmizə qarşı səsləndirdiyi əsassız açıqlamalarına aydınlıq gətirsin.

Səfirlikdəkilər unutmamalıdırlar ki, beşinci kalondakıları çıxmaqla bu ölkənin vətəndaşları üçün "Böyük Ermənistan" sevdalılarının sevimlisi Vudro Vilsonun yüz dörd il bundan öncə Parisdə gördüyü azərbaycanlılar haqda nə deməsi yox, ABŞ-ın regionda özünü necə aparması önəmlidir və bizim o dövlətə yanaşmamızı da məhz Pelosi kimilərin hərəkəti müəyyənləşdirir.”

Mənsur Mustafayev

Material Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır. İstiqamətin kodu 6.3.8