Bu gün Qeyri-Hökumət Təşkilatlarına Dövlət Dəstəyi Agentliyi və ADA Universitetinin İnkişaf və Diplomatiya İnstitutunun birgə təşkilatçılığı ilə QHT-lər üçün "İqlim Dəyişmələri və COP” mövzusunda təlimin rəsmi açılış mərasimi keçirilib. Təlimdə 100 QHT-dən nümayəndələr iştirak edir. Açılış mərasimində çıxış edən Prezident Administrasiyasının QHT-lərlə iş və kommunikasiya şöbəsinin QHT-lərlə iş sektorunun müdiri Tural Əliyev bildirib ki, bu gün Azərbaycan dövləti COP29-a ciddi hazırlaşır. Qlobal iqlim dəyişmələri, COP mövzusu olduqca geniş olduğundan ictimaiyyətin düzgün məlumatlandırılması, yeni istiqamət olan bu sahədə biliklərin artırılması çox vacibdir: "Cənab Prezident İlham Əliyevin rəhbərliyi ilə Azərbaycan qlobal siyasətə təsir göstərən addımları ilə dünyada böyük hörmət və nüfuz qazanıb. İqlim dəyişmələri səbəbindən su altında qalmaq təhlükəsi ilə üzləşmiş kiçik ada dövlətlərinə yardım Azərbaycanın COP29 ölkəsi kimi əsas qlobal təşəbbüslərindən biridir. Azərbaycan həmçinin müharibə aparan dövlətləri "COP atəşkəsi” təşəbbüsünə qoşulmağa, silahı yerə qoymağa, danışıqlar masasına keçməyə çağırır. Bu mənada COP29 həm də dünyaya sülh mesajıdır. Sevindirici haldır ki, Azərbaycan QHT-ləri öz fəaliyyətində bütün bu çağırışları və spektrləri nəzərə alır, tərəfdaşlarını, dünya dövlətlərini COP üçün vacib sənədlərdən biri olan İkillik Şəffaflıq Hesabatlarını (BTRs) vaxtında təqdim etməyə həvəsləndirir”. 

Ekologiya və təbii sərvətlər nazirinin müavini Vüqar Kərimov ADA Universiteti və QHT-lərə Dövlət Dəstəyi Agentliyinin birgə təşkilatçılığı ilə "İqlim dəyişmələri və COP” mövzusunda təlimin keçirilməsini yüksək qiymətləndirib. 

QHT-lərə Dövlət Dəstəyi Agentliyinin icraçı direktoru Aygün Əliyeva bildirib ki, Agentlik bundan sonra da QHT-lərin bilik və bacarıqlarının artırılması üçün vacib proqramlar icra edəcək. 

Prezident Administrasiyasının nümayəndəsi Mərziyə Vəkilova-Mərdəliyeva qeyd edib ki, "təmiz ətraf mühit və yaşıl artım ölkəsi" milli prioritet kimi qarşıya qoyulub. O, artıq Qarabağ və Şərqi Zəngəzurun, Naxçıvan MR-nın yaşıl enerji zonaları elan olunduğunu vurğulayıb. Qeyd edək ki, ADA-da təşkil olunan peşəkar təlimdə QHT-lər iqlim dəyişmələri konseptləri, bu sahədə əsas meyil və təzahürlər, BMT-nin İqlim dəyişmələri haqqında Çərçivə Konvensiyasının əsas müddəaları ilə yaxından tanış olacaq. 

Yekunda təlim iştirakçılarına sertifikatlar veriləcək.